أخر الاخبار


شعر شعبي عراقي 2022
شعر شعبي عراقي 2022

 شعر شعبي عراقي قصير:

لاتحزن بعد وتبچي على الراح

وعوف ادموع عينك لا تبديهه

ووگف على الجرح لاتصرخ وياه

وراح اكتب قصيدة والك اهديهَ

مدينة الم روحي لاتظــن ترتاح

وانه ابن المدينة وتيهت بيه

يل عندك جرح وتگلي مجروح

انه جروحي فاضت وين اودّيه

*****

فـاهي اللـيل يمـهم حتـى مابي لـون

ولا بـي طيـف يرهـم عالجـفن رسـمه

ماصـخ مسـتحاهم وآني مالـح طيــب

اليتبده وي غيــري بـروحـي مالمـه

بيها آعــناد روحــي وي الهـوى من يفوت

اذا يثـكل علـيّ لو مــوت مــا شمه

*****

اليذكروني عفتهم لجل شوكي وياك

واني اتذكّرك وانت الي ناسيني

بايعني برخص واني بغلاة أشريك

مو انت الگلت بالروح تشريني ؟

روح وداعت الله بس أگلّـك ها

الي رب كريم الصبر ينطيني

*****

هاك أخذ جرحك بعد ما أشتهيك

وكلمة انه اهواك تحچيها

وبس أوخر عنك اسنينك تطيح

اسنين عمرك .. عمري لمتجيها

ابگـاع خدينك أنه العاكس ضواي

آبمعنى آخر ........ انه لمحليها

ذكرياتك صارن ... الطف ويزيد

حيل اكرهك من يمر طاريها

*****

أقبل رجعتك بس عندي كومه شروط

أولهن تردلي سنين محسوبه

وثانيهن شبابي الهدر بين أوراق

وسهر ذيـچ الليالي المالهن حوبه

وثالثهن دموعي الصبّن بفرگـاك

على كل دمعه أفصلك فصل منهوبه

ورابعهن تروح تسكّت الشّمات

وتگلّهم حيل أحبّه وأبقه محبوبه

*****

انا عيوني تسولف عالغرام ويّــاك

ومن عيوني أعرفك تفتهم قصدي

ما أحب الوكت لو خلص بلــيّاك

بالقرأن محد حبك بگـــــدي

وإذا تنساني صدگ آني ما آنساك

لأنْ غيرك محب بالدنيا ماعندي .

*****

مو كل اليحب آيعيش فرحان ..

اكو واحد يحب بس هو يائس

واكو لمن يحب آيصارع الموت ..

ميهمه يصارع ألف فارس

ينشدونه آعله قيس وليلى كل يوم ..

أشو محد ذكر بالعشــگ عابس

*****

تعال وياك أخذني وخـــــل نروح آبعيد

ونعيش الفرحه كافي وخل نعوف الهـمّ

تعبنه الوكــــــــــت والقدر بينه يدوس

مجروحين آحنه والجرح يلجـــــــــــم

محد بينه داري وعذبانـــــــه الحــآل

وألك هذا الحچـي يـلّ وحــــدك آلتفهم

كل شي يخـون بينه لكن انّـه ويّـــــآك

أبد منخون حبنه وربك اليعلـــــــــــــم

*****

تعال ولا تظني عليك زعلان

چا هو الگلـب من نبضه يزعل

صدگني أبد ما همني الصار

ولا زهرة محبتك عندي تذبل

مو انه دفنتك حدر العيون

أشوفن بيك ساعه وبيك آندل

عذبني هواك ومرمر الروح

وآگـولنّ ما يهم هو يتدلل

*****

يدك براس حبك يزغيرون

وآحن لحرورتك حنين النوك

حقي ارتبك ووگوع من أﻻگيـك

رمش عينك يفهي العدهن الطلوك

الشمس شتعودلك شويچوي ملكاك

دفؤ زنودك على المستبرد يلوك

حايط بابكم معذور إذا طاح

الله يساعده بكل لحظه مدگوك

*****

ليش تبچـي .... الناس أجو سألوني

جاوبتهم .... هذا حظ آعيوني

گالــــوا آضحك ...

عوف دمعك ...

حيل آضحك ...

خل نسمعك ...

توني أجيت اضحك .. واجو بچوني؟؟

*****

روووووح گتلك ليش أخذت حچايتي !!!!!!

سوالفك والليل سلبن رااااحتي

دمعي طاح وعاذرك

ومن اصلي الخاطرك

(هيچ أگولن ربّـي رجعه بداااعتي

*****

إنخاف ما نحچي الحقيقه

أيعـذرونه أيجوز

بأنواع العقاب

أنخاف لو مطنه اللثام

أنروح بيها

لو كشفناه النقاب

سافرينه وأحنه مجبورين

لا بد أن نسافر

أنجبرنه أعلى الغياب

سافرينه أويانه أخذنه

ذكرانه مليانَـه حزن

ومجسّــمه بصورة عذاب

*****

الله مايهديچ وتحبيني

أستحي من الشيب خليتني

من أشم عطرچ عشر مرات أموت

عا لجمر مشلول مشـيتيني

الله ميهديچ وتحبيني

*****

ﻻ‌ تحچي بعنف من تنصح الناس

آبدي بعيب نفسك يلّـه تتكلم

الگدامك بشر مو كومة آحجار

لذلك من تجرحه تشوفه يتألم

آبدي بكلمة طيبه ورقّـة واحساس

حتى يحب حديثك ومنّـه يتعلم .

*****

آني ما أخون ربعي

حتى لو خانو

وإذا هين عليهم

هم ما هانو

چانو على الاقل

ذاك الوكت زينين

وراح اسكت

لخاطر كلمه

الچانو

ماظن تنحمل لحظات صفناتــــــــــــــــه

اذا برموشه شايل كومـــــــــة سيوف

ياكلب اليشيل اصواب طعناتــــــــــــــه

يمكن بالبشر مــــــــــــــاشفت مخلوق

واحد بالارض يضحك بضحكاتــــــــــــــه

نغم موسيقى يضحك جنهــــــه قانون

بت هوفن تراهــــــــــــه اتصير سكتات

مشتاكلج اوين الكاج البعد كاسر الواهس

مشتاكلج خليني اشوفج بأي مكان

ردي خجلان بكبر جرح العراق

مشتاكلج واني مو ايوب حته احمل جفاج

والله مو قصدي اعوفج مو ركضت اني ابراج

الحب ابد مو عيب صدكي وعيب اليفارك حبيبه

مشتاكلج


دفتر ذكرياتي تكلبه تقراه

على خد الورق ماتلكه دمعات

ليغرك كتبت بصفحه مشتاك

نسيتك وانتهت بهواي صفحات

واذا اسمك لكيته بنص الاسطور

اسم ابليس كلمه بنص الايات

الك كلبي فتحته وردتك تفوت

وكفت انته اعله صفحه وخنجرك فات


صوابك ماخطاني أمعلم أيصيب

أحس جتف بجتف صفكلك أكفاي

يالبايعني صوت بسوك خرسان

مر بكل وكت تلكالي شراي

جدمي بدرب ذل أمسبك وياك

ودرب غيرك كرامه بعين ممشاي

على خدودي الدمع لوسير اغروب

تسيورة جمر لجدام حفاي


ياشيطان عقلي اشلون وياك!

ابمزاجاتك تسكتني إوتحَجيني


وتاخذني ابهواك اهنانه وهناك!

وإذا خطواتي ضاعت ما تدليني!

ساعه اتكلي بيك ايفكر اهواك

وساعه اتصَوره فد مره ناسيني!


ياشيطان راح اتعمد انساك

وتكف هالعلاقه البينك اوبيني


مابينه انتفارك والعمر محسوب

اشما يفتر الميل اسنينه اتعدي

بعدك والشماته ارماح مسمومات

رمح وحشي اوحياتك ماخطن جبدي

اتحدى اليكول اعيوني بيهن ماي

دمع اجفاك بركت ناكته ابخدي

بطران اليكول ارتاح كون انساك

شريد انسه اوشبكتك ضاله ابزندي


ابحلك جرحي سوالف ضام اهواي

الك يلما وفيت اوياي بلعشره

جنت اقره المحنه ابيوم الاكيك

هسه الفاتحه امن الكاك كمت اقره

شيب راس جرحي امن اول افراك

وتخيل ابجرحي اخلافك شكبره

عفتني ابروح جاهل ناطر العيد

وبواهس يتامه امتانيه الفطره


ذلتني المحبه ودم بجيت النوب

كرهت الدنيه كلهه شلون ذلتني

بجتني اعله حبك سهرتني الليل

وعينك هاي انت بغيض بجتني

ابد ما انسه جرحك وانه الك ممنون

... واطباعك تجارب كومه علمتني

بس اصبر علي لازم يجيلك يوم

وتضل تصرخ يناس النار جوتني


مرامك وين توصل كافي ما مليت

الك نيه تحس وتوكف بحدك ؟

الفرشتلك جنحهه وشالتك للغيم

لا تدبج عليها اتوقع تهدك !

لوحدك من تظل معناها جف تصير

وعمرك ما تصفك من تظل وحدك

ناصفتك بروحي وصرت شركه وياي

بيه وكلشي عندي وكلشي ماعندك


شتســـولف بعــــد وي خـــاطري المكســــور؟!

جــــام إتكسّـــــر بيا سالفـــــه تجبّــــره...؟


صفــــره جفـــوف إديــــك وحجيــــك المسمـــوم

لـــون أصفــر طلــع والريـــــح إجـــــت صفـــــره


عســــاهــه إبخــت گلبــــي المـــاعرف يختــــار

والعــرفنــــي بيــــك بحظــــــــه وبعمـــــــــره


هســـــه تـــريد تــــرجــــع مــن بعـــــد ماراح

عمـــري وشــد متــــــاعه وتيهــت عمـــره


بيـــافشلــة جـــــرح؟ ياعاطفــــــــه أتلگـــــــاك؟!

أگلــك ثـــلج بعــــدك صــــــــارت الجمــــــــره


جبت كل هذا العمر ألله كريم/

صار أطول من عمر نوح العمر/

عمر كضّيته بعسر يهدم جبال/

موطني وبيتي صفه هذا العسر/

عشت دنية ضيم ممزوجه بجراح/

ومن بطن أمي البست درع الصبر/

صح اعيش بعزه ما مذلول دوم /

وصح اعيش بكوخ أحلا امن القصر/

لكن الدنيه بطبعهه تريد امور/

يا أمر ينجلي متبوع بأمر/


انا المشتاكلك بــــــــس رايد انســــــــاك

واريدنك تجيني ولا تجيني

وماريد التقي فد يوم وياك

من الكاك كون انطيك عيني

مدمن بيك حد منازع الروح

ما تدري بقدر شوكي وحنيني

يمدمن بيك ما فكرت فد يوم

اشتريتك بالغلا ما تشتريني ؟


فدوة اطلع من وكت يوم الدوام


بس عطل خلّص حبيبي اسبوعنه


انته من ماجيت خربطت النظام


والمدارس عزّلت بفروعنه


خطوتك دكّة جرس لمّن تفوت


وعلى جيتك كمنه نضبط سوعنه


ماخذني الكبر والحيل شايب صار

وما أدري ألسنين شلون أكملهه

عفتني شلون كَلي ليا سبب تعبان؟

ألمشاعر وأللًة بعدك راح ابطلهه

تكحل ألكحلة عينك حتة حلوة تصير

ما عندي أني عين شلون أكحلهه

شجرة بنص نهر ما تعرف ألعوز

بس جيب أليكَايش حتة يوصلهه


من اكول اشفايفك وي كلبي فد روح

تتهامس عليه وتضحك الناس

اذا من دون علمي وباسك الغير

وي لمسة اشفافك كلبي ينداس

كون الله بكثر مارقه مطيك

مخليلك ضمير وذرة احساس

الف مره كلتك كلبي مو زين

يوجعني اذا بطيف تنباس

اذا مابيك وجهي تبيضه فد يوم

انا اترجاك كافي تبيض الراس


تجي ميت شعورك حاسبك خطار

الميت من يسير ماترده الكاع

بشوغة ليل بعدك أمطر ملاكاة

يالغيمت عشرتك نكطتلي أوداع

حسبتك نفس وتملكت عالروح

شفايتلي النفس لو ينشره وينباع

جابعتك بأول شهكه من أغتاض

ولارخصت روحي ويمك أنذليت

الميت والنفس بيناتهم دفان

وانه وعشرتك بيناتنه أهل البيت

انه ابن ابوي وهوابني ايصيح

واذا صار المزامط بيه اتنخى

يتوصى الطفل والمافهم دنيا

وانه المثلي جريمه اتكول يتوصى

انه امعلم الجدم من يمشي فوك الكاع

وانه اعرف من شمرته شيطلع بشصى

الماتلوي اذنه وهوه جانان ازغير

بعد ماتنفع ابكبره ضربت العصى


اعوفك شي طبيعي ولازم انساك

لأن مــا بيــه حيـل اصـبر ولاحيـر

مثل يـوسـف احس بقصتي وياك

وعلة هذا الامر راح انطي تفسير

كلتلي شـكــد احبك انـة واهواك

وبـس عاينت بيهة تخيــلت بـيـر

ومثل عطشان اجيتك واعرف بهاي

سراب ومن اكــضـك رأسن اطـيـر

غشيم وما عـرفتك هيجي ويــاي

غـراب ولابـس هـدوم العـصـافـيـر


كلشي اتوقعت بس نفترك لا..!!

جانت حسبه سهله ومحسبتهه

جانت قصه حلوه وبيها احلام

اجيت بنفط هجرك وحركتهه

تذكر من رسمنه اعل الشجره كلبين

خيطت الجروح من ارسمتهه

وعد انطيتني نبقى احنه للموت

حب عشرة عمر دايم قدرهه

))امد ايدي من الشماته خاطر تعود

صلف جف ايد قلبك ما شبكهه


مدري شلون وتفض حالتي وياك..

قسمه انت وعلي ربك كتبها


كبل لاعب كليبي هواي وي ناس..

بس لعبة غرامك مالعبها...


تجذب عيني سهله اكبال العيون..

بس وياك احس يصعب جذبها


وبس وياك كلبي احسابه غلطان..

حسب كلشي وسكـتك ماحسبها

عجيبه اطباع روحي وياك محتار..

اعاتب والكه روحي تضد عتبها

اموت من اليحبك واشتعل نار..

عكس ناس التكرهك حيل احبها

أشوه صورتك يم اليحبوك..

والشينات كلهه اعليك اذبها


تــرضى لــيـش انـــت تعذبني بجـــفـــاك

ولــيـــش انت بغيابك تـــظـــل تجـــرحني


انـــي شــكــثر طــيـــب افــــرح بملكاك

وانـــــت تـــســوي عكسي وماتفرحني


تـــجـــرحنـــي وتـــروح ومايهمك شــي

وكــبـــال الشماته انـــوب تفـــضحــني


مــــاريــدك بعد لاتجي وتحجي وياي

ولاريـــدك تبررر كــــاافــــي تشرحلي


انــــي مليتك بـــعــــد مـاريدن هواك

وبعد مــااصــلـح الك ولاانـت تصلحلي


شعر شعبي عراقي للأب:

شجاني او من جديد انوب حبيّت


جنت عاقل ، واكيد اوياك جنيّت


تبت توبه نصوحه امن العشك دوم


او على فيض المشاعر حرس خليّت


إقفلت كلبي قفل مرعوب وبليل


عجيبه اشلون كلي الكلبي طبيّت


للعشرين جن ارجعت وياك


او جن كبلك ولا فد يوم حبيّت

*****

على رموشك كحل ، من حزن ودموع


او على وركة خريفي افراح نديّت


ياعين التشيلك يا شمس آب


اشيلنّك جمر لو الك صديّت


فداك الراح كله ، او انذر الجاي


او عمت عينه اليكلك يوم ضحيّت


يا آخر ملاذ ابشحة الطيب


او بيت انته او فداك ايروح كل بيت

*****

تمنيتك تجي ، ابأول اللجمات


واشكد احلمت بيك او تمنيت


لو تدري فرحتي ابجيتك هاي


او لو تدري اشجبت وياك من جيت


جبت بسمه لشفافي العطشن اسنين


والف جرح ابجرح بالروح داويت


كلي اذنوب ادري ، او روحك ايمام

****

نزعت الماضي وابيض كلب طبيت


ومن نور البروحك شاهت العين


او كبل ما طوف بعيونك تحفيت


اعيشك لحظة لحظة او اشكي الفراك


انت وياي كلك وآنه سليّت


ريتك تبقى كتلك ، ريتك اوياي


او كلشي البيك اسمعه ايكول ياريت


كبلك ما عشت ، موعمر محسوب


خشبة كنطرة او للدوس ظليت


 

تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -